Kṣemarāja: Bhairavānukaraṇastotra

oṃ namaś cidbhairavāya |

citibhūmisamāśrayaṇāś citibhūtiṃ śrayata mā mudhā bhramata |
prathayann iti bhaktimatāṃ jayati śivo 'nugrahapravaṇaḥ || KsBhAS_1

cidbhairavam eva paraṃ paramāmṛtarūpam ekam atidīptam |
ullasitakaraṇacakragrastasamastaṃ śivaṃ vande || KsBhAS_2

stutyaḥ stotā stutir iti yad api vibhinnaṃ na kiṃcid astīha |
mṛṣati yathā yad rūpaṃ cidrūpatayā tathā bhavaty etat || KsBhAS_3

vigalitasarvavibhedaṃ sarvavibhedātma cidghanānandam |
yat tava tattvaṃ bhagavaṃs tasyānukṛtiṃ tvadākṛtiṃ vande || KsBhAS_4

rekhāpuruṣaḥ puruṣaṃ varṇalipir varṇasaṃcayaṃ yadvat |
tadvat vicitrarūpaṃ tvām ākāro vyanakti paramātman || KsBhAS_5

tatrāvikalpam eva tvāṃ cidrūpaṃ samāviśya |
vimṛśāmaḥ kim api manāṅ na hi tattvaṃ kalpanāviṣayaḥ || KsBhAS_6

svātmaprabhāṃ vidhāya vāgdevīṃ viṣayakusumakḷptārcaḥ |
prathamonmeṣaṃ gurum atha vanditvā hṛdayam āviśya || KsBhAS_7

staumi vimṛśan maheśvaram ātmānaṃ svaṃ cidekaghanam |
srāvitapāśakadambakam etasmin dehadevagṛhe || KsBhAS_8

cityānandecchāvitkaraṇākhyāḥ śaktayo jayanti vibho |
sūkṣmasthūlabhidāptā vaktratvaṃ brahmamuṇḍabhidhā || KsBhAS_9

sarvajñatādiviṣayaṃ hṛdayādikam aṅgaṣaṭkaṃ te |
sakalaṃ sadāśivāntaṃ pretātmatayā tavāsanaṃ svāmin || KsBhAS_10

paramaprakāśavapuṣo vimarśaśaktiḥ prabho parā devī |
asyā eva prasaraḥ sarvā brāhmyādikā devyaḥ || KsBhAS_11

dahanajalāmṛtalekhāviṣādi bibhrat tvam ādiśasy etat |
viśvaṃ viruddham api saccidrūpe mayi virudhyate naitat || KsBhAS_12

saṃvitsūtranilīno niḥsāro mātṛnivaho 'yam |
karaṇamuṇḍamālabhārin darśayasītīva naḥ svāmin || KsBhAS_13

paśyata paśyata pāśā viṣamās ta ime bahiṣkṛtāḥ śaśvat |
ity antradhāraṇamiṣat kathayaṃs tvaṃ naḥ samābhāsi || KsBhAS_14

māyāpaṭaḥ sarāgo vyomni pare 'smin sa eṣa nikṣiptaḥ |
iti gajacarma saraktaṃ mūrdhni vahan kathayasīśa || KsBhAS_15

antaḥśaktikṛpāṇīm vyanakṣi saṃsṛtivibhedinīm asinā |
nijaśaktimahimasvīkṛtasamastaviśvā hi vīravarāḥ || KsBhAS_16

bhavabhayahantā so 'ham sānāthye 'vasthito 'smi mā bhaiṣṭa |
ity āsphoṭitakheṭakadarśanato diśasi naḥ svāmin || KsBhAS_17

nijaśaktipāśavalitaś cidvapuṣā kalyate mayā kālaḥ |
iti pāśadhāraṇavaśāt prathayasi naḥ kālakālas tvam || KsBhAS_18

bhedamayam akhilam etan nijaśaktyaivākṣipāmi saṃhartum |
ity aṅkuśadhāraṇataḥ sphuṭayati parabhairavo 'smākam || KsBhAS_19

kodaṇḍārūdhaśarapradarśanād brahmaviṣṇurudreśān |
sasadākhyaśivāñ chaktyā kāraṇahariṇaṃ bhinatsi mṛgavat tvam || KsBhAS_20

varadena pāṇinā tvaṃ viśvavibhūtipradatvam abhinayasi |
na khalu paratattvaniṣṭho vibhavamalaiḥ spṛśyate jātu || KsBhAS_21

abhayena ca bhavabhayāni unmūlayatā prakāśyate satatam |
viśvānugrahakāraṇasvabhāvatā tava karatalena || KsBhAS_22

akhyātirūpam asamaṃ māyāyāḥ śakalitaṃ śiro 'traitat |
parabodhamayena mayā muṇḍaṃ bibhrat prakāśayasy evam || KsBhAS_23

niḥśeṣahṛtasārā mayy eva jagatsthitiś cidekaghane |
iti khaṭvāṅgakaraṅkodvahanacchalato dadāsy ājñām || KsBhAS_24

vīṇāghaṇtāḍamarūn uḍḍāmara vādayann idaṃ diśasi |
vṛttitribhedabhinnaṃ nādaṃ śṛṇvan sthito 'smīti || KsBhAS_25

kiṃ ca parādikaśaktitritayārāsundarām mahāśaktim |
devānukaroṣi bahis triśūladhāraṇamiṣeṇa nityaṃ tvam || KsBhAS_26

icchādikanijaśaktiprakāśitādhaḥsthagocaratritayām |
svām eva parāṃ śaktiṃ vajramayīṃ vahasi ṣaḍarāṃ tvam || KsBhAS_27

jagad akhilaṃ macchaktyā damitaṃ sarvavyāvasthitīr dhatte |
iti daṇḍadhāraṇavaśād vyanakṣi cidbhairavāsmākam || KsBhAS_28

mudgaraparaśū bibhrad baindavanādānukārarūpau tvam |
bhedavibhedanaśakalanaparatvam īśāna nirdiśasi || KsBhAS_29

darśanabhedāt svāminn anyānyām āhṛtiṃ dadhānas tvam |
bhairavaparabodhamayaṃ prathayasi nijadhāma sarvatra || KsBhAS_30

śāktāṇḍakhaṇḍamadhye viśvarasāḥ sarvam ahaṃ pibāmi sadā |
vyañjayasi narakapālagarudhiramiṣād etad iva me 'ntaḥ || KsBhAS_31

abhimānahṛdayabandhānutkhātau tāv imau saśikhau |
mūrtāv iva muṇdābjau prathayan dhatse mahākālaḥ || KsBhAS_32

akhilajagadbījabhuvaṃ prathamasthām anukaroṣi bodhanidhe |
karatalagabījapūrakadarśanalīlāyitād deva || KsBhAS_33

bhairavarūpo 'py asi yat tatrāpi kare 'kṣamālikāṃ dhatse |
tat sarvākṣavikāsād viśvaṃ parivartayasy antaḥ || KsBhAS_34

asthikaramuṇḍamālābhasmābharaṇo nṛraktaruciḥ |
viśvaṃ brahmamayatvāc chuddham itīśaḥ samādiśasi || KsBhAS_35

svātmārāmamayānāṃ viṣamā api viṣayabudbudhāḥ kim amī |
smaradahanam alikanayanam prathayan paramāgnirūpam ādiśasi || KsBhAS_36

antarnibaddhalakṣyaḥ pravikāsikaraṇo 'pi yat sadā bhavasi |
tat prathayasi sarvadaśaṃ gatamohakalaṅkam ātmānam || KsBhAS_37

deva digambaratā te vadati nirāvaraṇam ātmano rūpam |
paramabrahmamayārkān māyāvaraṇam kathaṃ vṛṇuyāt || KsBhAS_38

saṃhartā sarveṣām arkādīnām ahaṃ tamobhūmiḥ |
nirmalaśāradagaganaprabheṇa vapuṣeti darśayasi || KsBhAS_39

paramabrahmamayas tvaṃ deva yadāśrayasi bhairavākāram |
tat prathayasi tattvajñaḥ saty api bhede vimukta iti || KsBhAS_40

vividhaśmaśānamālāvetālāvṛtaḥ prakāśayase |
saṃvittiviṣayakalanāmadhyaś citibhairavo 'smīti || KsBhAS_41

tvayy evāmṛtalekhā paraśaktimayī parapramātātaḥ |
nātha tvam eva jagatām jīvanam iti bhāsi no hṛdaye || KsBhAS_42

tava śabdarāśivapuṣaḥ pratyaṣṭakam eva bāhyaparivāraḥ |
parasūkṣmādivibhedād bhairava lokeśvarapramukhāḥ || KsBhAS_43

mudrayati nikhilam etan niḥśeṣasvasvarūpasaṃkramaṇāt |
modayati bhaktavargaṃ gatimudaṃ pūrṇatāprathanāt || KsBhAS_44

mocayati pāśajālaṃ drāvayati vibhedam īśa te mūrtiḥ |
mudrayati vividhasaṃviddraviṇaṃ mudrā tataḥ kathitā || KsBhAS_45

jayati paratattvabhūmipravare nipāyabhūtaiṣa |
sphuṭam adhivasatu satattvaprathayā hṛdayasya meyamalam || KsBhAS_46

pratikalam udeti saṃvid yā kila tatra sphuraty adho viśvam |
śivaśaktivibhavarūpaṃ jānanti maheśa yāgasthāḥ || KsBhAS_47

itthaṃ sphurasi sadā me cidbhairava sarvabhūtātma |
tad yāgādijapāntaṃ sampannam ayatnataḥ sarvam || KsBhAS_48

iti śrīmahāmāheśvarācāryaśrīkṣemarājaviracitaṃ bhairavānukaraṇastotraṃ samāptam ||