[321] Dünjens

De Spree de is kam,
Singt lusti vun babn,
Kumt ok wul de Hadbar,
Kumt ok wul dat Fröhjahr
Un all wat der singt,
Wat Summer uns bringt.
De Winter is hin
As Snee anne Sünn,
As Kummer an Morgen,
As Klagen un Sorgen
Un Gram œwer Nacht,
Wennt Hart wedder lacht.

[Wul achtern Wall to schuern]

[322]
Wul achtern Wall to schuern,
Wul mank dat Gras to liggn,
Dar is dat nett to luern,
Dar is dat smuck to singn;
Dar stiggt de Lurk mi œwern Kopp,
De Iritsch sett sik dal,
Dar singt wi Vageln alltohop
Wi Vageln alltomal.

[Kumt Voerjahr man wedder]

[323]
Kumt Vœrjahr man wedder,
So kumt ok de Freid:
Kumt Gras op de Wischen,
Kamt de Köh op de Weid.
Kumt de Sünn dœr de Wulken
Un de Hadbar opt Nest –
Un Abends en Maanschin,
Denn kumt eerst dat Best.

[Keen Graff is so breet un keen Müer so hoch]

[324]
Keen Graff is so breet un keen Müer so hoch,
Wenn Twee sik man gut sünd, da drapt se sik doch.
Keen Wedder so gruli, so düster keen Nacht,
Wenn Twee sik man sehn wüllt, so seht se sik sacht.
Dat gift wul en Maanschin, dar schint wul en Steern,
Dat gift noch en Licht oder Lücht un Lantern.
Dar finnt sik en Ledder, en Stęgelsch un Steg:
Wenn Twee sik man leef hebbt – keen Sorg vœr den Weg.

[Jehann, nu spann de Schimmels an!]

[325]
Jehann, nu spann de Schimmels an!
Nu fahrt wi na de Brut!
Un hebbt wi nix as brune Pęr,
Jehann, so is't ok gut!
Un hebbt wi nix as swarte Pęr,
Jehann, so is't ok recht!
Un bün ik nich uns Weerth sin Sœn,
So bün'k sin jüngste Knecht!
Un hebbt wi gar keen Pęr un Wag',
So hebbt wi junge Been!
Un de so glücklich is as ik,
Jehann, dat wüllt wi sehn!

[Wi gungn tosam to Feld, min Hans]

[326]
Wi gungn tosam to Feld, min Hans,
Wi gungn tosam to Rau,
Wi seten achtern Disch tosam,
So warn wi old un grau.
Bargop so licht, bargaf so trag,
So menni, menni Jahr –
Un doch, min Hans, noch ębn so leef,
As do in brune Haar.

[An de Kark]

[327]
An de Kark
Wahnt de Prester,
Un de Möller wahnt an Dik,
Un ik wahn
Bi min Leefste,
Seeg ęr jeden Ogenblick.
Geit de Klock
Anne Karkwand,
Gat de Rœder innen Grund,
Geit min Hart
Noch vęl muntrer,
Nix as Lev de drift dat rund.

[Inn Klockenthorn babn Karkenboen]

[328]
Inn Klockenthorn babn Karkenbœn
Dar geit en Rad mit isern Tähn,
Un wenn de ole, de dowe, de Küster ni weer,
So keem der keen starbens Minsch, vunne ganze Eer.
De Möllerbursch sitt ganz alleen,
He süht in dat Rad, dat drift de Steen
Un wenn de ole, de dowe, de Küster sin Dochder ni weer,
Wat kunn der so lusti sik dreihn oppe ganze Eer?

[In Garn ünnert Finster - de Bom is so grön]

[329]
In Garn ünnert Finster – de Bom is so grön –
Singt all Nacht en Vagel so truri, so schön.
Bi Meddersch schreeg œwer – so witt is de Stuv –
Singt all Dag Anneeten un lacht as en Duv.
Dat lacht un dat weent, un dat kloppt mi ant Hart,
Kloppt jümmer in Takt, bet en Leed derut ward.

[De Sneierlus]

[330]
De Sneierlus
De driggt sin Hus,
Ol Juchen Snack
De driggt sin Pack,
De ganze Węk, dat ganze Jahr,
Du kikst ni op, so is he dar.

[Min zuckersöt Suschen, wat wullt du di grämn?]

[331]
Min zuckersöt Suschen, wat wullt du di grämn?
Kumt Wihnachten wedder, so will ik di nęhmn!
Wüllt Pępernœt kopen un Hasselnœt knacken,
Un so'n groten Koken ut Deeg wüllt wi backen!
Min zuckersöt Suschen, nu gräm di ni sehr!
Denn ward wi mal öller, so danzt wi ni mehr!
Denn schrapt wi den Grapen, denn schrapt wi dat Geld,
Denn gat wi mit so'n lange Näsen to Feld!
Min zuckersöt Suschen, nu gräm di man nich!
Ik heff noch dree Süsselnk, dat weest du man nich!
Dree Süsselnk un Dreelnk, un so'n groten Hot!
Un'n grishempen Geldsack, noch eenmal so grot!

[Ol Trin anne Lamp]

[332]
Ol Trin anne Lamp,
Ol Hans innen Damp,
Ol Trina mit Brillen,
Ol Hans mit sin Grillen,
Se spinnt un se snackt,
Kaut Schęv un Toback.

[Blauwippsteert an Bek]

[333]
Blauwippsteert an Bęk,
Lüttj Rothback inne Kœk,
Lüttj Flasskopp ant Spinnrad –
Kumm, ra' mal, wat is dat?
Un wullt du ęr fang',
Ra' jo ni to lang!
License
Der annotierte Datenbestand der Digitalen Bibliothek inklusive Metadaten sowie davon einzeln zugängliche Teile sind eine Abwandlung des Datenbestandes von www.editura.de durch TextGrid und werden unter der Lizenz Creative Commons Namensnennung 3.0 Deutschland Lizenz (by-Nennung TextGrid) veröffentlicht. Die Lizenz bezieht sich nicht auf die der Annotation zu Grunde liegenden allgemeinfreien Texte (Siehe auch Punkt 2 der Lizenzbestimmungen).
Link to license
Citation Suggestion for this Edition
TextGrid Repository (2012). Groth, Klaus. Dünjens. Digitale Bibliothek. https://hdl.handle.net/11858/00-1734-0000-0003-0B56-B