Auff hn. Johann Kestners vnd jungfraw Saren Junckers hochzeit:
Wär' ich Demosthenes vnd hätte solche gaben
Als Tullius gehabt/ hätt' ich Maronis konst!
Hätt' ich Nasonis arth; vnnd aller Musen gonst!
Hätt' ich was ein Poët' vnd redener soll haben!
Denn wolt ich ewr gehör' herr bräutigam recht laben/
Denn wolt' ich ewre braut/ vnd beyder fewr vnd brunst/
Außstreichen nach gebür. Nu denn mein wunsch vmbsonst/
Vnd dieses mein Sonnet/ nicht wie es soll/ wil traben/
So komm Demosthenes vnd Tulli/ lass dich hören/
Der braut zu lieb vnd lob/ dem bräutigam zu ehren.
Sie preiset jung vnd alt/ jhn lobet jedermann.
Ach Naso/ lebtstu noch/ du soltest einverleiben
Der grawen ewigkeit/ die ich nicht kan beschreiben/
Weil jhr lob grösser ist/ als ich sie loben kan.