VVahre buß eines recht zerknirschten hertzens
1.
Wan abends vnß die braune nacht
Im schatten schwartz verkleidet/
Vnd ich dan meine sünd betracht/
Groß noth mein hertz erleidet.
Von lauter leyd/ von trawrigkeit/
Mein augen mir fast rinnen
Zun Sternen auff/ so seind im lauff
Ich schaw mit trüben sinnen.
[83] 2.
Halt/ halt/ jhr scheinend perlen klar
Ihr tausend liecht/ vnd fackel:
Halt/ halt/ jhr wolgezündte schar/
Ihr fewr vnd flamm ohn mackel:
O schöne Stern/ nit lauffet fern/
Hört an waß euch wil klagen:
Du schöner Mon auch bleibe stohn
Hör an mein leyd vnd zagen.
3.
Ach/ ach/ was angst/ vnd hertzen-leid!
Bin gar mit sünd befangen:
Auff/ auff/ jhr heisse brünlein beid/
Nun rauschet mir von wangen.
Ach schöne Stern/ wolt ich so gern
Wär nie von Gott gewichen:
Ach schöner Mon/ was hab ich thon?
Mein Seel ist todts verblichen.
4.
Fließ ab/ fließ ab/ du thränen bad/
Für leyd kan dich nit halten:
Wäsch ab all sünd/ vnd missethat/
Daß hertz ist schon gespalten.
O trewer Gott! hab dein gebott
In wind/ vnd lufft geschlagen:
O frommer Herr! von dir so ferr
Die sünd mich hat getragen.
[84] 5.
Ey wie nun wil ichs greiffen an?
Mit Recht mags nie beschönen:
Ey wie wil ich vor dir bestahn?
Dein angesicht versöhnen.
O Schöpffer mein/ ichs nit vernein/
Vor dir ich muß erstummen/
Bins freilig werth/ mich Fewr/ vnd Schwerd
Reib auff in gleicher summen.
6.
Doch nit/ wan brinst in eyffermut/
Dir stell mein sünd zugegen:
O nit/ wan bist in voller glut/
Mich laß mit straff belegen.
Bedeck mit gnad all meine that;
Nit mehr der sünd gedencke/
Ach nur ins Meer/ nur weit vnd ferr
Sie tieff in grund versencke.
7.
Schaff Herr/ daß ich mit zähren heiß
Den grimmen dein vergüte;
Mich mach recht schnee- vnd Schwanen-weiß
Wäsch ab das alt geblüte;
Achs ist geschehn! kans nit vmbgehn:
Nun kränckets mich von hertzen/
[85]Vnd ich von leyd fast jederzeit
Zerfließ gleich einer kertzen.
8.
Ach dörfft ich nur zun augen dein
Mein augen auffrecht schlagen/
Dörfft nur dich nennen vatter mein/
Wie zärtlich wolt ich klagen!
O vatter mein/ wolt nur allein/
O vatter mein wolt sprechen:
Da würd alßbald/ mit gnaden spalt/
Dein hertz in stuck zerbrechen.
9.
Da würd dein miltes ingeweid
Wie wachs vom fewr zerfliessen/
Da würdest mich mit armen beid
An deine wangen schliessen.
Ach nur nim an wolt sprechen dan/
Nach deiner grossen milte;
Nim an geschwind/ dein armes kind/
So gangen war ins wilde.
10.
Gleich würdest den verlohren sohn
Mit frewden groß empfangen/
Vnd geben jhm die vorig Cron/
Mit kleinod viel behangen.
Auch wurdest bald/ ohn auffenthalt
Gar prächtig bancketiren/
[86]Vnd wurdest frey/ mit jubelschrey/
All höffling dein tractiren.
11.
Nun bin ichs je mit nichten werth/
Darff dich kein Vatter nennen:
Auch du/ weil alles hab verzehrt/
Wirst mich kein sohn mehr kennen/
Ach wo muß dan ichs greiffen an?
Wem/ wie dan muß ichs klagen?
Ach/ ach was rath/ ist zimlich spath:
Jedoch nit will verzagen.
12.
O sternen still/ O stiller Mon/
Deß elends laßt euch dauren.
Mein leyd euch laßt zu hertzen gan
Mit mir thut kläglich trawren.
Ach haltet ein den halben schein/
Euch halber thut zerspalten
Vnd halt zu nacht nur halbe wacht/
Laßt finsternuß halb walten.
13.
Ja freylich/ freylich gar/ vnd gantz
All augen thut beschliessen/
Verleschet allen schein/ vnd glantz/
Kein eintzen stral last schiessen.
Zur rew/ vnd leyd bin ich bereit;
Ade/ Sonn/ Mon/ vnd sternen.
[87]Nur trawren gar ich muß fürwahr/
Vnd spiel vnd schertz verlernen.
14.
Ade dan/ eins vnd abermahl/
Ihr liechter schön gezündet/
Ade/ verleschet alle stral;
Euch gantz hab auffgekündet.
In dunckler nacht/ ich bin bedacht
Mein tag/ ohn tag volbringen;
Nur trawr-gesang/ mein leben-lang
Bey mir soll stäts erklingen.
15.
In finsternuß gewunden ein/
Ich meine jahr werd schliessen.
Mein speiß/ vnd tranck mir sollen sein
Die zähr/ so werd vergießen.
Mein kranckes hertz ich leg in schmertz/
In schmertzen laß ichs rasten:
Wans dan verscheidt ist schon bereit
Der schmertz zum todten-kasten.
16.
In schmertzen/ qual/ vnd trawrigkeit
Mein leben soll passiren:
In wee/ vnd ach/ vnd stätem leidt
Wil meine zeit verlieren.
In holem wald/ der deutlich schallt,
Ein hüttlein werd ich schlagen;
[88]Da soll vor all der Echo schall
Mit mir mein jammer klagen.
17.
Mit seufftzen viel in grossem hauff
Die wund ich wil vermehren:
Die bächlein sollen schwellen auff/
Von meinem vielen zähren.
Die bäum/ vnd stein/ sie mögen sein/
Die Felsen hart vnd Eichen/
Mit thränen heiß/ mit augenschweiß
Ich hoff noch werd erweichen.
18.
Wer weiß ob nit der fromme Gott
Die gnaden brust erschliesse?
Wer weiß ob nit Herr Sabaoth
Daß gnaden-meer ergiesse?
Die schrifft vermeld/ der glaub es helt/
Wer Buß mag redlich tragen/
Find je noch gnad/ ist nit zu spath:
Vnd wer dan wolt verzagen?