Anleitūg zur erkandtnuß vnd liebe deß Schöpffers auß den geschöpffen
1.
Daß meisterstuck mit sorgen
Wer nur wilt schawen an/
Ihm freilich nit verborgen/
Der meister bleiben kan.
Drumb wer nun heut vnd morgen/
Erd/ himmel schawet frey/
Denck nachts mit gleicher sorgen/
Wie je der meister sey.
O mensch ermeß im hertzen dein/
VVie vvundermuß der Schöpffer sein.
2.
Von oben wird vnß geben
Daß liecht/ vnd gülden schein/
In stätem lauff/ vnd leben/
Sonn/ Mon/ vnd himmel sein.
Deß tags biß auß den abend/
Die Sonn gar freundtlich lacht/
Zu nacht der Mon Gott lobend/
Führt auff die sternen wacht:
[110]O mensch ermeß im hertzen dein/
VVie vvunder muß der Schöpffer sein.
3.
In etlich tausent jahren/
Vil tausent sternen klar.
Kein härlein sich verfahren;
Gehn richtig immerdar.
Wer deutet jhn die strassen?
Wer zeiget jhn die weg?
Daß nie nit vnderlassen?
Zu finden jhre steg.
O mensch ermeß im hertzen dein/
VVie vvunder muß der Schöpffer sein.
4.
In lauter grüne seyden/
Gar zierlich außgebreit/
Daß erdreich thut sich kleiden/
Zur werthen Sommerzeit.
Die pfläntzlein in den felden/
Sich lieblich mutzen auff/
Die grünen zweig in wälden/
Auch schlagen auß mit hauff.
O mensch ermeß im hertzen dein/
VVie vvunder muß der Schöpffer sein.
5.
In gärten merck ich eben/
Die schöne blümelein/
[111]Wie frewdig sie da schweben/
Wan windt nur spielt hinein;
O frölich garten jugend!
O frisch/ vnd zartes blut!
Ohn zahl hast farb/ vnd tugent/
Wers denckt in stillem muth.
O mensch ermeß im hertzen dein/
VVie vvunder muß der Schöpffer sein.
6.
Vnd wie werd dan gemohlet
Ihr blümlein tausend-falt?
Weil alles jhr doch holet
Auß schwartzer erden kalt;
All safft/ vnd krafft/ vnd wesen/
Ihr nembt von schlechter Erd/
Vnd doch wer euch geht lesen/
Nicht zierlichers begehrt.
O mensch ermeß im hertzen dein/
VVie vvunder muß der Schöpffer sein.
7.
Die brünlein sich ergiessen/
Vnd jhre wässer klar/
Wie silber stralen schiessen
Von felsen offenbahr:
Die Sonn es bald erblicket/
Drin kühlet jhren schein.
Die thier es auch erquicket/
[112]Wans heiß vnd dürstig seyn.
O mensch ermeß im hertzen dein/
VVie vvunder muß der Schöpffer sein.
8.
Frisch hin vnd her gehn wancken
Die klare bächlein krumb/
Vnd mit den steinlein zancken/
Wans müssen fliessen vmb.
Allweg sie süßlich sausen/
Zum sang vnd gang gewohn/
Daß gantze jahr ohn pausen
Man höret jhren thon.
O mensch ermeß im hertzen dein
VVie vvunder muß der Schöpffer sein.
9.
Die flüß vnd breite wässer
In still/ vnd sanfftem trab
Schiff/ nachen/ pack/ vnd fässer
Lan führen auff vnd ab.
So pur vnd rein sie lauffen
(Muß kecklich sagen daß)
Wers will gar zierlich tauffen/
Der nents geschmoltzen glaß.
O mensch ermeß im hertzen dein/
VVie vvunder muß der Schöpffer sein.
10.
Vnd wütet ungestüm:
Daß wilde meer nun brauset/
[113]Nun still es wider sauset/
Ligt vest in runder krümm/
Gar lieblich thuts bestralen/
Die Sonn/ mit sanffter glut/
Wan sie zum offtermalen/
Sich drin erspieglen thut.
O mensch ermeß im hertzen dein/
VVie vvunder muß der Schöpffer sein.
11.
Wer will die bäum nun zehlen/
In jen- vnd jenem wald?
Seind deren doch ohn fehlen
So tausent/ tausent falt.
Gar hoch die gipffel klimmen/
In klaren lufft hinauff/
Vnd gleich den Wolcken schwimmen/
Wan stoßt ein windlein drauff.
O mensch ermeß im hertzen dein/
VVie vvunder muß der Schöpffer sein.
12.
Der zweig vnd näst seind tausent/
Vnd tausent/ tausent viel.
Mehr tausent/ tausent/ tausent
Der blättlein/ vnd der stiel.
Doch äderlein bey neben/
Noch mehr man zehlen thut/
Da nehret sich daß leben/
Vnd seel in grünem blut.
[114]O mensch ermeß im hertzen dein/
Vvie vvunder muß der Schöpffer sein.
13.
Wan dan schallt auff den zweigen
Gesang der vögelein/
Noch Laut/ noch Harpff/ noch Geigen
Klingt also süß/ vnd rein:
Ihr lieblichs musiciren
Mich dünckt so sauber gut/
Ihr künstlichs coloriren/
Bringt lauter frewden muth.
O mensch ermeß im hertzen dein/
VVie vvunder muß der Schöpffer sein.
14.
Die Nachtigal ob allen
Steigt immer auff/ vnd auff;
Gar frewdig thuts erschallen/
Wans geht in vollem lauff.
Man sagt daß etlich starben/
Zu hoch wans wolten gahn/
Vnd mit zu starcken farben/
Ihr stimlein streichen an.
O mensch ermeß im hertzen dein/
VVie vunder muß der Schöpffer sein.
15.
Wer wolt nun vberdencken/
Der vielen vögel zahl?
[115]Die Sonn sich würde sencken/
Eh man sie nennet all.
Wer wolt jhr federn zehlen/
Vnd feder-farben zart?
O Gott/ muß dirs befehlen/
Eß seind vnzahlbar art.
O mensch ermeß im hertzen dein/
VVie vvunder muß der Schöpffer sein.
16.
Von thieren muß ich schweigen/
Vnd lassens vngezehlt:
Ins meer wil auch nit steigen/
Daß ich von fischen meldt:
Von mensch- vnd menschen kinden
Wil gar nit regen an/
Kein end ich da könd finden/
Wils in der still vmbgan.
O mensch ermeß im hertzen dein/
VVie vvunder muß der Schöpffer sein.
17.
Elphanten/ sampt Camelen/
Roß/ Löwen/ hirsch/ vnd Bär/
All würm/ vnd alle Seelen
So seind im wilden meer/
Wer mensch mags je beschreiben/
Ihr eigenschafft vnd art?
[116]Thut weißlich wers laßt bleiben/
Wer wort vnd feder spart
O mensch ermeß im hertzen dein/
VVie vvunder muß der Schöpffer sein.
18.
O schönheit der naturen!
O wunder lieblichkeit!
O zahl der Creaturen!
Wie streckest dich so weit?
Wer wolt dan je nicht mercken
Deß schöpffers herrligkeit/
In allen seinen wercken
Gantz voller zierlichkeit.
O mensch ermeß im hertzen dein/
VVie vvunder muß der Schöpffer sein.