[Erste Version]
In der weis, Nun welche je, etc. oder Regine thon.
1.
Frolock, o Tochter Zion, fast
erjauchz, du Christlich gmeinde!
Es kommt dir jtz der werde gast,
dein Bräutgam vnd dein freunde.
Freu dich mit dem,
Jerusalem!
dein König kommt, on zirde,
Doch gnadenreich,
eim heiland gleich,
empfangt jhn mit begirde.
2.
Gantz sehr demütig kommet er,
das er dich nicht erschrecke,
Geritten auff eim füllen her,
das er sein macht verdecke:
Aber jdoch
so sigt er noch,
vnnd richtet auff mit freuden
Durch demut gros
sein reich on mos,
das ist ein sighafft reuten
3.
Dan also will ich, spricht der Herr,
die gotlosen ausrotten,
Der hohen pferd vnd jr gesperr,
da ist der stoltzen, spotten:
Ir vngestüm
vnd grossen grimm
soll er allein erlegen
Mit seiner stimm,
das niemand rüm
vor Got etwas vermögen.
4.
Sein demut jren pracht vernicht,
sein geist jr fleisch verachtet,
Sein predig jr streitbogen bricht,
jr ratschlag er verlachet,
Dieweil er lehrt
frid auff der erd
durchs Evangeli frone,
Nachts gwissen frej
durchn glauben neu,
vor Got fridsam zustone
5.
Vnnd wiewol er ist fridlich still,
noch wachßt sein reich behende,
Auch wider der Tirannen will,
bis an der welt jr ende,
Vō einem Meer
zum andern sehr
in Inseln kommt es auffe,
Das macht, man kan
nicht widerstan
seim Wort welchs hat den lauffe.
[823] 6.
Durch das blut seines Bunds so theur
lößt er die gfangnē aussen
Von der gruben sehr vngeheur,
darin kein wasser saussen,
Sond' voll not,
voll sünd vnd tod
vnd allem greuel ware:
Die hat er nun
durch sein gnugthun
zerstört, befridigt gare.
7.
Derhalben seit des sigs vernügt,
jr arm beträugte leute!
Ir die auff hoffnung gfangen ligt,
kehrt zu der festung heute!
Besitzet sie
in glauben hie,
so bleibt jr sighafft Helden,
Dan er verkünd,
heut sei er gsint
dirs doppel zuvergelten.
8.
Jauchtz, Tochter Zion, spricht der Herr,
dan ich dein kinder wille
Erwecken vber alle ferr,
das ichs mit gnad erfülle,
Will stellen dich
gantz sicherlich
gleich wie eins Risen schwerdte,
Welchs jm nimand
nimmt aus der hand,
dan mein wort ewig wärte.
9.
Der Herr der wird erscheinen auch
vber die kind' seine
Dz er sie zu Apostlen brauch
die sein wort lehren reine:
Der HERR der würd,
wie sich gebürt,
die Posaun als dan blasen
Vnd tretten her
wie wetter schwer
die sich vom mittag lassen.
10.
Der Herre der herscharen, Gott,
der wird sie selbst beschirmen,
Das sie durch sein wort vnd gebot
verzeren als vnd stürmen
Vnd vnder sich
gewaltiglich
die schläuderstein bezwingen
Vnnd girend sein
wie neuer wein:
dem eckstein mus gelingen.
11.
Dan in seim land vnd in seim reich
da werden auffgerichtet
Heilige stein, den kronen gleich,
die von jm han das lichte:
Was han sie dan
guts zu voran
[824]vnd schöns vor andern mehre?
Das Korn, den most,
Gots wort vnd Trost,
dz stärckt jr jugend sehre.
12.
Nun disen most vnd dises korn,
dz Evangeli tröstlich,
Bringt dir sanfftmütig vnd on zorn
heut vnser Christus wäslich:
Derhalben vff!
nun frölich ruff,
du Christlich kirch zusammen,
›Hossanna sehr,
gelobt sej der
so kommt ins Herren namen!‹